Sesion informues me bizneset e diasporës në Gjermani

MINT/KIESA organizoi sesionin informues me bizneset e diasporës në Gjermani

Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), më 23 shtator ka organizuar në Dyseldorf  të Gjermanisë Sesionin informues: “Mjedisi i biznesit dhe klima e investimeve në Kosovë”.

Në këtë sesion informues, bizneset pjesëmarrëse të diasporës u njoftuan nga Mirsad Simnica, zv. udhëheqës i Sektorit për Promovim të Eksportit në KIESA rreth shërbimeve të agjencisë dhe sektorëve potencial për investime në Kosovë.

Pjesëmarrësit, ndër të tjera, u informuan edhe nga përfaqësues të Administratës Tatimore dhe Doganave të Kosovës rreth shërbimeve e procedurave tatimore dhe doganore në Kosovë.

Pas sesionit, përfaqësuesit e KIESA-s kanë zhvilluar takime me bizneset pjesëmarrëse, ku janë dhënë sqarime rreth fushave të cilave kanë shprehur interesim.

Në kuadër të sesionit janë zhvilluar takime B2B, ku kompanitë kosovare pjesëmarrëse në panairin “DMEXCO” të sektorit të IT-së kanë zhvilluar takime me kompanitë e diasporës për të krijuar mundësi bashkëpunim në të ardhmen.

Sesioni informues u zhvillua në bashkëpunim me Ministrinë e Punëve të Jashtme dhe Diasporës, përkatësisht me Ambasadën e Republikës së Kosovës në Berlin dhe Konsullatën e Kosovës në Dyseldorf të Gjermanisë, si dhe Rrjetin e Bizneseve të Diasporës Shqiptare në Gjermani.

---