Sezoni i polenit nis më herët dhe zgjat më gjatë në Zvicër

Sezoni i polenit në Zvicër po fillon gjithnjë e më herët dhe po zgjat më gjatë, duke rritur shqetësimet për personat që vuajnë nga alergjitë

Sipas ekspertëve dhe të dhënave meteorologjike, temperaturat më të larta dhe dimrat më të butë kanë bërë që bimët të lulëzojnë më herët se zakonisht, duke nisur sezonin e polenit që në fund të dimrit ose në fillim të pranverës, shkruan Swissinfo.ch, transmeton albinfo.ch.

Në vitin 2026, sezoni ka nisur më herët për shkak të kushteve të buta klimatike, me pemë si lajthia dhe verri që kanë filluar të lëshojnë polen që në shkurt.

Ekspertët paralajmërojnë se ndryshimet klimatike jo vetëm që po e zhvendosin fillimin e sezonit, por po e zgjasin edhe kohëzgjatjen e tij. Kjo do të thotë se personat alergjikë janë të ekspozuar për një periudhë më të gjatë ndaj polenit dhe simptomat mund të jenë më të forta.

Në përgjithësi, sezoni i polenit në Zvicër fillon në fund të shkurtit ose në fillim të marsit dhe mund të zgjasë deri në fund të verës, në varësi të llojit të bimëve dhe kushteve atmosferike.

Specialistët këshillojnë personat që vuajnë nga alergjitë të fillojnë trajtimin më herët dhe të monitorojnë nivelet e polenit, pasi intensiteti i sezonit pritet të rritet në vitet në vijim.

---