Shaqiri: Vij nga një familje e varfër, babai im ishte punëtor i rrugëve

Ylli i futbollit shqiptar, Xherdan Shaqiri ka folur për fëmijërinë e tij dhe synimet me Liverpoolit

Xherdan Shaqiri është një shembull në fushë dhe jashtë saj. Rrugëtimi i suksesit nuk ka qenë aspak i lehtë.

I lindur në Zhegër të Gjilanit dhe i shpërngulur nga Kosova në moshën 1-vjeçare, shkoi drejt Zvicrës, së bashku me familjen, ku e prisnin shumë sfida.

Ai së fundi shënoi dy gola ndaj Manchester United, por asnjëherë nuk e harron familjen dhe vendlindjen, derisa është shumë modest, shkruan albinfo.ch.

Shaqiri në një intervistë për faqen zyrtare të klubit të Liverpoolit, tregon për fëmijërinë e tij.

Ai ka thënë se kishte idhull Ronaldon e Brazilit dhe fanellën e tij e mbante me pasion të madh.

Shaqiri shtoi se nuk vjen nga një familje e pasur. “Babai im ishte punëtor i rrugëve. Ai punonte shumë për familjen tonë. Gjithashtu kujdesej për familjen në Kosovë, të cilët ishin të varfër, gjithashtu. Por, unë jam shumë krenar me ta”, është shprehur Shaqiri.

Ai theksoi se është shumë i lumtur që luan në kampionatin më të fortë në botë. “Shpresoj se do të kemi suksese së bashku me Jurgen Klopp. Jam shumë i lumtur që punoj me të. Ai është një trajner i madh. Ëndrra im është të fitoj trofe me këtë klub”.

---