SHBA: Prigozhin ishte target i shpërthimit që e rrëzoi avionin e tij

Keystone (AP Photo, File)

Sipas inteligjencës amerikane një shpërthim i qëllimshëm shkaktoi rrëzimin e avionit, në të cilin ndodhej udhëheqësi i grupit mercenar Wagner, Yevgeny Prigozhin.

Një nga zyrtarët amerikanë tha se vlerësimet paraprake tregojnë se Yevgeny Prigozhin ishte “me shumë gjasë” në shënjestër dhe se shpërthimi përputhet me “historinë e gjatë të Putinit për t’u mbyllur gojën kritikëve të tij”, shkruan Zëri i Amerikës.

Zëdhënësi i Pentagonit, gjenerali Pat Ryder, tha se raportet e shtypit se një raketë tokë-ajër rrëzoi avionin ishin të pasakta.

Ai nuk pranoi të thoshte nëse Shtetet e Bashkuara dyshonin për një bombë apo besonin se përplasja ishte një atentat, përcjell albinfo.ch.

Detajet e vlerësimit të inteligjencës amerikane u publikuan ndërsa Presidenti Putin shprehu ngushëllimet e tij për familjet e atyre që u raportuan se ishin në bordin e avionit dhe iu referua “gabimeve serioze” të Prigozhinit.

Presidenti i Shteteve të Bashkuara të Amerikës, Joe Biden, tha se besonte se Presidenti Putin kishte gisht në rrëzimin e avionit, megjithëse ai e pranoi se nuk kishte informacion që verifikonte vlerësimin e tij.

Kremlini i cilëson gënjeshtra akuzat se vrau kreun e Wagnerit, Prigozhin.