Shërbimi Informativ i Zvicrës ka kontrolluar 2 milionë veta

Në të njëjtën kohë, NDB ka kryer hetime për 22 persona që konsiderohet se e rrezikojnë sigurinë e brendshme të Zvicrës

Shërbimi Informativ i Zvicrës (NDB) gjatë vitit 2015 në kuadrin e masave të sigurisë, ka bërë verifikimin e të dhënave të 2 milionë personave. Ky numër është për gjashtë herë më i madh se ai i vitit 2011, kur kjo masë ishte marrë ndaj rreth 350 mijë vetave.

Shtimi i numrit të personave të verifikuar ka të bëjë me ashpërsimin e masave kundër terrorizmit, bën të «NZZ am Sonntag»

Në të njëjtën kohë, NDB ka kryer hetime për 22 persona që konsiderohet se e rrezikojnë sigurinë e brendshme të Zvicrës. Shumica dërmuese e tyre janë hetuar në lidhje me rrezikun nga terrorizmi islamik, transmeton albinfo.ch.

Personat e dyshuar janë 9 azilkërkues, 4 persona që kanë bërë kërkesë për vizë në Zvicër dhe të tjerë që në Zvicër kanë ardhur në cilësi të ndryshme ose ishin duke jetuar tashmë këtu.

Megjithatë, numri i madh i personave, të dhënat e të cilave janë verifikuar, ka të bëjë në të shumtën e rasteve me pasagjerët në transportin ajror. Gjatë vitit 2015 NDB ka kontrolluar afërsisht 1.3 milion pasagjerë.