Shfrytëzon rrugën e urgjencës dhe filmon ambulancën, ndalohet kosovari

Policët konstatuan se shoferi kosovari e kishte filmuar udhëtimin e autoambulancës dhe vendin e aksidentit me celularin e tij

Policia Kantonale e Cyrihut ka ndaluar të martën pasdite një shofer në Regensdorf (Cyrih) i cili po e drejtonte makinën e tij private mbrapa një autoambulance që po lëvizte në korsinë e urgjencës.

Një përplasje kishte ndodhur në tunelin Gubrist rreth orës 3.20 pasdite, shkruan polizeinews.ch.

Ndërkohë që  drejtuesit tjerë të automjeteve i hapnin autoambulancës një shteg shpëtimi, një shofer 40-vjeçar vendosi ta ndiqte me makinën e tij, ambulancën e cila kishte ndezur dritat dhe sirenën, transmeton  albinfo.ch.

Kur një tjetër ambulancë me sinjale paralajmëruese iu afrua makinës nga pas, shoferi e futi sërish automjetin e tij në kolonë. Por ai tashmë u ndalua nga policia në vendin e aksidentit. Policët konstatuan se shoferi kosovari e kishte filmuar udhëtimin e autoambulancës dhe vendin e aksidentit me celularin e tij, përcjell albinfo.ch. Ndaj tij raportohen një numër i shkeljeve të ligjit.

Ndërkaq në përplasjen që kishte ndodhur në tunelin Gubrist, në drejtim të Bernës, janë lënduar  dy shoferë, njëri 41 dhe  tjetri 59 vjeç. Kjo ishte arsyeja përse autoambulanca po shkonte drejt spitalit. Në orën 4:40 pasdite vendi i aksidentit ishte pastruar dhe tuneli mundi të përdorej normalisht.

---