Shitjet e banesave në Evropë u rritën në vitin 2025, Sllovenia kryeson me rritjen më të madhe

Kostot më të ulëta të huamarrjes rigjallëruan tregun e pasurive të paluajtshme në shumicën e vendeve evropiane. Franca regjistroi mbi një milion transaksione, ndërsa Sllovenia shënoi rritjen më të madhe të shitjeve.

Tregu i banesave në Evropë rifitoi vrull gjatë vitit 2025, megjithëse çmimet e pronave vazhduan të rriteshin në pjesën më të madhe të kontinentit. Sipas të dhënave të publikuara nga Eurostat dhe të analizuara nga Euronews Business, shitjet e banesave u rritën në 17 nga 20 vendet evropiane të përfshira në analizë.

Belgjika dhe Austria ishin ndër vendet që regjistruan rritje vjetore të shitjeve mbi 20%, ndërsa Sllovenia kryesoi me një rritje prej 29.9%.

Pasuritë e paluajtshme mbeten burimi kryesor i pasurisë së familjeve në eurozonë, sipas Bankës Qendrore Evropiane. Shumica e blerësve blejnë banesa për t’i përdorur si vendbanim, ndërsa një pjesë e konsiderojnë investim afatgjatë.

Sipas këshilltarit për pasuri të paluajtshme në Global Property Guide, Mikk Kalmet, transaksionet në tregun rezidencial ndikohen kryesisht nga përballueshmëria e kredive hipotekare, normat e interesit, të ardhurat e familjeve, niveli i punësimit, besimi i konsumatorëve dhe oferta e banesave.

Vendet me rritjen më të madhe

Pas Sllovenisë, rritje të konsiderueshme regjistruan:

Sllovenia – 29.9%

Lituania – 22.8%

Austria – 21.4%

Belgjika – 20.2%

Luksemburgu – 18.6%

Hungaria – 17.3%

Holanda – 13.9%

Danimarka – 12.7%

Franca – 11.2%

Portugalia – 10.5%

Rritje pranë 10% u regjistruan edhe në Letoni (9.2%), Finlandë (9%) dhe Norvegji (8.3%).

Ndër ekonomitë më të mëdha evropiane, të dhënat ishin të disponueshme vetëm për Francën dhe Spanjën. Në Spanjë, shitjet e banesave u rritën me 5.4%.

Kalmet theksoi se Franca shënoi një kthesë të rëndësishme, duke kaluar nga rënie në vitin 2024 në rritje gjatë vitit 2025, ndërsa Spanja ruajti ritëm pozitiv për të dytin vit radhazi.

Rënie vetëm në tre vende

Nga 20 vendet e analizuara, vetëm Kroacia, Bullgaria dhe Polonia regjistruan rënie të shitjeve të banesave.

Kroacia – -4.1%

Bullgaria – -2.5%

Polonia – -1.1%

Në vitin 2024 shitjet kishin rënë në gjashtë vende, ndërsa në vitin 2025 numri i tyre u përgjysmua në vetëm tre, çka tregon një rimëkëmbje të përgjithshme të tregut evropian.

Sipas Kalmet, kjo rikuperim lidhet me përmirësimin e kushteve të financimit dhe rikthimin e kërkesës që ishte shtyrë gjatë periudhës së normave të larta të interesit.

Kroacia, përjashtimi i vetëm

Megjithëse Kroacia mbetet një nga destinacionet më të kërkuara turistike në Evropë dhe çmimet e banesave vazhdojnë të rriten me ritme të shpejta, shitjet kanë rënë për të katërtin vit radhazi.

Midis tremujorit të parë të vitit 2025 dhe atij të vitit 2026, çmimet e banesave në Kroaci u rritën me 14.3%, niveli i katërt më i lartë në Evropë. Po ashtu, vendi regjistroi rritjen më të madhe të qirave, me 39.1% gjatë së njëjtës periudhë.

Kalmet vlerësoi se Kroacia ishte i vetmi vend ku shitjet ranë për dy vite radhazi, duke treguar se faktorët e brendshëm vazhdojnë të dominojnë tregun e banesave, pavarësisht rimëkëmbjes së përgjithshme evropiane.

Franca kryeson për numrin e transaksioneve

Nga 14 vendet për të cilat kishte të dhëna të plota mbi numrin e transaksioneve, Franca renditet e para me më shumë se një milion banesa të shitura gjatë vitit 2025.

Në Holandë u shitën rreth 265 mijë banesa, ndërsa Hungaria, Belgjika, Portugalia dhe Norvegjia regjistruan secila nga 130 mijë deri në 160 mijë transaksione.

Edhe pse Sllovenia pati rritjen më të madhe në përqindje, ajo regjistroi vetëm rreth 11 mijë shitje, numri më i ulët mes vendeve të analizuara. Sipas ekspertëve, në tregjet më të vogla ndryshimet në përqindje priren të jenë më të theksuara.

Oferta e kufizuar vazhdon të ushtrojë presion

Ekspertët vlerësojnë se stabilizimi i normës Euribor dhe i interesave bankare ka rikthyer besimin e blerësve që kishin shtyrë vendimin për të blerë një banesë gjatë periudhës së pasigurisë.

Megjithatë, kostot e larta të ndërtimit dhe ritmi i ulët i ndërtimeve të reja vazhdojnë të kufizojnë ofertën e banesave në shumë vende evropiane, duke mbajtur nën presion çmimet e tregut.

---