Shitoret në Gjermani, humbje të mëdha nga mungesa e blerësve zviceranë

Vitin e kaluar, konsumatorët nga Zvicra në qarqet kufitare të Gjermanisë, si: Lörrach, Waldshut dhe Konstancë kishin blerë mallra për rreth 1.5 miliardë euro

Shitoret në Gjermaninë Jugore, pjesa që kufizohet me Zvicrën, janë të hapura që nga fundi i prillit. Megjithatë, shumë prej tyre aktualisht nuk kanë pothuajse asnjë klient sepse kufiri me Zvicrën, për shkak të koronavirusit, ka mbetur kryesisht i mbyllur, shkruan srf.ch.

Shoqata tregtare e Baden-Württemberg ka anketuar 700 tregtarë dhe si përgjigje ka marrë një rezultat të qartë: një e katërta e tyre bënte 80 për qind më pak shitje sesa para krizës, transmeton albinfo.ch.

Vitin e kaluar, konsumatorët nga Zvicra në qarqet kufitare të Gjermanisë, si: Lörrach, Waldshut dhe Konstancë kishin blerë mallra për rreth 1.5 miliardë euro, sipas shoqatës tregtare. Shitësit në Gjermaninë jugore tani shpresojnë për hapjen e kufirit, që është paralajmëruar për 15 qershor.

Në sektorin e shitjes me pakicë të ushqimit, shitjet kanë rënë midis 30 dhe 60 për qind, thotë menaxheri i përgjithshëm i IHK Hochrhein-Bodensee, Claudius Marx.

“Shumë tregtarë kanë frikë për ekzistencën e tyre nëse nuk do të ketë së shpejti hapje të plotë të kufijve me Zvicrën”, transmeton albinfo.ch. E njëjta gjë vlen për gastronominë, industrinë e hotelerisë dhe shërbimet e shumta, biznesi i të cilave varet nga kontakti i drejtpërdrejtë me klientin.

---