Shkolla gjermane merr emrin e shqiptarit!

Ajo do të mbajë emrin e Refik Veselit, një heroi të heshtur shqiptar, të njohur për shpëtimin e hebrenjve gjatë Luftës së Dytë Botërore

Një shkollë fillore në Berlin merr emrin e një shqiptari. Bëhet fjalë për shkollën e tetë  të integruar, e cila qysh në këtë vit shkollor, në gjysmëvjetorin e dytë, do të mbajë emrin e Refik Veselit, një heroi të heshtur shqiptar, të njohur si njëri ndër bashkëkombësit e tij jo të pakët që kanë shpëtuar hebrenjtë gjatë Luftës së Dytë Botërore.

Autoritetet e shkollës kishin marrë që më herët vendimin për emrin shqiptar të shkollës së tyre por procedurat burokratike e kishin shtyrë këtë për një kohë. Së fundi, edhe enti për arsim i qarkut Friedrichshain-Kreuzberg e ka bërë të ditur vendimin.

Refik Veseli, i cili në kohën  luftës kishte qenë 17 vjeç, kishte fshehur dhe mbrojtur një familje hebreje që në Shqipëri kishte ardhur nga Jugosllavia, shkruan morgenpost.de.

Veseli kishte mbajtur edhe pas luftës kontakte me familjen e shpëtuar. Sot ai dhe një numër shqiptarësh janë nderuar me titullin e “Njerëzve të drejtë” nga organizatat hebrenje që kultivojnë kujtimin për holokaustin.