Shkup: Partnerët e vjetër bëjnë qeverinë

Bashkimi Demokratik për Integrim dhe VMRO-DPMNE-ja kanë arritur marrëveshje për koalicion në mandatin e ardhshëm katërvjeçarë

Marrëveshja është arritur pas takimit në mes liderit të BDI-së, Ali Ahmeti dhe atij të VMRO-DPMNE-së, Nikolla Gruevski.

Sipas burimeve të larta të BDI-së, partia e Ahmetit në qeverinë e ardhshme do të udhëheqë me pesë ministri dhe 2 zëvendëskryeministra, atë për eurointegrime dhe zëvendëskryeministrin për zmplementimin e Marrëveshjes së Ohrit, njoftojnë agjensitë e lajmeve në Shkup.

Po sipas burimeve, partia shqiptare në këtë mandate do të udhëheqë me Ministrinë e Mbrojtjes, atë të Drejtësisë, të Pushtetit Lokal të Ekonomisë dhe Ministrinë e Ambinetit dhe Planifikimit Hapësinorë.

Marrëveshjen për koalicionin e ka miratuar Kryesia Qendrore e BDI-së, në një takim urgjent i cili ka zgjatur deri në orët e vonshme.

Në këtë takim lideri i kësaj partie, Ali Ahmeti ka informuar kryesinë Qendrore me rrjedhën e bisedimeve, ndërsa në seancën e radhës kjo parti do të vendosë edhe për emrat të cilët do të udhëheqin me këto resore.

BDI-ja, gjithashtu do të ketë edhe pesë zëvendësministra dhe po aq sekretarë shtetërorë.