“Shkurtimi” i fundit i Zvicrës, Andi Zeqiri nuk luan në Kampionatin Evropian në Gjermani

Keystone

Andi Zeqiri ra viktimë e “shkurtimit” të fundit në skuadrën e Zvicrës dhe u fut në listën e gatishmërisë nga trajneri Murat Yakin. Kjo do të thotë se në skuadrën e Zvicrës për EURO 2024 në Gjermani janë 26 lojtarë.

Kombëtarja do të udhëtojë të hënën në kampin e Kampionatit Evropian në Shtutgart. Turneu për Zvicrën fillon më 15 qershor me ndeshjen kundër Hungarisë në Këln, transmeton albinfo.ch.

Është konfirmuar skuadra e Zvicrës prej 26 lojtarësh për Kampionatin Evropian në Gjermani, që fillon pas një jave. Trajneri i Kombëtares, Murat Yakin, ka hequr Andi Zeqirin si lojtarin e fundit nga lista e tij.

Zeqiri do të jetë në dispozicion të skuadrës në gatishmëri, njoftoi Federata Zvicerane e Futbollit. Fabian Rieder dhe Ardon Jashari, dy kandidatë të tjerë të lëkundur, do të jenë në raundin final, shkruan SRF.

“Andi na e ka vështirësuar vendimin. Kohët e fundit ka performuar shumë mirë. Ditët e stërvitjes treguan se ka shumë konkurrencë edhe në ofensivë, për këtë arsye iu dha përparësi lojtarëve të tjerë”, ka thënë Yakin, pasi ka marrë vendimin.

Ndryshe, deri më tani, Zeqiri ka luajtur 11 ndeshje të kombëtares.