Shqipëri: Mbyllja totale do të jetë masa e fundit

Shefja e Survejimit dhe Shërbimit të Inteligjencës Epidemike në ISHP në Shqipëri, Eugena Tomini, deklaroi sot se karantina totale do të jetë faza e fundit dhe masat e ndërmarra kufizuese u vendosën për të minimizuar transmetimin e virusit, shkruan atsh, përcjell Albinfo.ch.

Duke u ndalur te masat e reja kufizuese, të cilat hynë në fuqi nesër, Tomini gjatë një intervsite televizive theksoi se “çdo 2 javë vlerësojmë indikatorët sa u përket rasteve pozitive, vdekjeve, shtrimeve spitalore, shërimeve…etj. Ky monitorim na vë para përgjegjësisë sa u përket masave. Edhe në rajon dhe në botë po u rikthehen masave. Për shkak të këtyre indikatorëve që kanë kaluar në një nivel të lartë alerti, kemi vendosur kufizim të bareve dhe restoranteve dhe kufizim të lëvizjes përtej orës 22:00. Duam ta minimizojmë transmetimin e infeksionit sa kemi mundësi nëpërmjet këtyre masave, për të mos shkuar në ekstrem”.

Mbi zonat më të riskuara të përhapjes së COVID-19 në vendin tonë, Tomini tha se “aktualisht është bërë një kategorizim i riskut sipas nivele. Nuk është vetëm Tirana që mban peshën e pandemisë, por dhe qarqet që kanë peshë dhe numër të lartë”.

E pyetur nëse do t’i rikthehemi një karantine totale, ajo u shpreh se kjo do të jetë faza e fundit kur të jenë ezauruar dhe shfrytëzimi i kapaciteteve spitalore.

“Jemi duke vlerësuar të gjitha masat lehtësuese që kanë qenë deri në këto moment dhe duke parë rritjen e rasteve. Janë duke u vlerësuar të gjitha subjektet. Transporti është një element i domosdoshëm, por vendosja e maskës si një masë e vetme nuk duhet të kuptohet si e vetme. Janë vendime që do të merren në dinamikë varësisht situatës”, tha Tomini.