Shqipëria dëshiron tri pikë përballë Andorrës

Kuqezinjtë do të përballen me Andorrën në udhëtim nga ora 20:45

Edy Reja do t’u besojë lojtarëve me më shumë përvojë dhe atyre që po kalojnë formë të mirë në sfidën e parë kualifikuese të Botërorit, ndaj Andorrës, në transfertë.

Kuqezinjtë do të luajnë në transfertë ndaj Andorrës më 25 mars, ndërsa më 28 mars përfaqësuesja kuqezi do të presë Anglinë në Tiranë. Takimi i tretë do të luhet më 31 mars ndaj San Marinos sërish në transfertë, përcjell albinfo.ch.

Trajneri italian tha se e ka në kokë formacionin, ndërsa për aktivizimin e Bajramit pritet një konfirmim i fundit nga UEFA.

“Nuk kemi patur shumë ditë në dispozicion për ta përgatitur këtë ndeshje. Ekipi ka qenë pak i lodhur këto ditë për shkak të aktivizimit të lojtarëve në skuadrat e tyre. Kemi pasur mungesa nga dëmtime dhe COVID-19 më parë, por tani situata është normalizuar. Lojtarët janë në formë, pasi kanë luajtur me skuadrat e tyre, duhet përqendrim dhe fokus gjithashtu. Duam ta nisim aty ku e lamë, duhet të bëjmë kujdes nga Andorra, duke pasur parasysh ndeshjen që kemi kaluar më pare me këtë kundërshtar.”

Në pritje të lejes për Bajramin: “Duhet të presim një konfirmim nga FIFA, sepse është një situatë e komplikuar, ai ka lindur në Maqedoni, është rritur në Zvicër dhe do të luajë për Shqipërinë. Është një element që mund të na ndihmojë shumë për të ardhmen, duhet pritur leja për pjesën e debutimit.

S’ka vend për nënvlerësim: “Ne kemi pasur probleme me Andorrën dhe në fushën tonë. E njoh si skuadër. E kam parë në Ligën e Kombeve, është skuadër që të vë në vështirësi, ka karakteristika të veçanta, ka lojtarë të shpejtë dhe nuk të lë hapësira. Duhet të tregohemi të kujdesshëm dhe mos iu lejojmë hapësira”.

---