Shqipëria dhe Kosova luajnë në “Botërorin e vogël të futbollit”

Derisa në Francë po zhvillohet Kampionati Evropian i futbollit, në stadiumin Letzigrund në Cyrih, 16 ekipe futbolli nga e gjithë Zvicra do të marrin pjesë në “kampionatin e vogël botëror” Mundialito 2016, që do të mbahet më 2 dhe 3 korrik, shkruan albinfo.ch.

Shumica e ekipeve përbëhen nga emigrantët, të cilët përfaqësojnë 16 vende të prejardhjes së tyre.

Dhe, në këtë “botëror të vogël” për herë të parë 4 ekipe me 40 lojtarë do të përfaqësojnë Shqipërinë.

Ndërsa përfaqësuesja e Kosovës kishte marrë pjesë edhe më herët  në kampionatin  Mundialito.

Për të krijuar 4 ekipe që do të përfaqësojnë Shqipërinë nuk e kishin edhe lehtë Bajramali Neziri, me origjinë nga Gostivari, dhe Enver Shaqiri, me prejardhje nga Bujanoci.

Që nga shkurti Bajramali Neziri në rolin e organizatorit dhe Enver Shaqiri, në rolin e koordinatorit, kishin shëtitur shumë klube në tërë Zvicrën pas talenteve të vegjël shqiptarë të futbollit.

4 ekipe, njëri quhet „tinejxher“, tjetri „junior“, pastaj „pampers“ dhe ai i vajzave „girls“. Të gjithë ekipet që pëfaqësojnë Sqhipërinë dhe Kosovën numërojnë 80 futbollistë që do të tregojnë talentin e tyre në botërorin e vogël të futbollit në Zvicër.

„Përveç lojës Fair Play, ne do të promovojmë edhe talentet, po edhe do t‘i inspirojmë ata për t’i lidhur me kombëtaren e tyre”, thotë për albinfo.ch Enver Shaqiri, koordinator në ekipin e Shqipërisë.

Bajramali Neziri, në rolin e organizatorit, thotë se përveç informacioneve që kishin nga klubet, ku luajnë futbollistët e vegjël, ata kanë shëtitur nëpër Zvicër për të bërë grumbullimin e tyre.
„Mundialito 2016“ do të jetë një shans i mirë për talentet shqiptarë të futbollit, thotë Neziri.

Ekipin „Albania“ e përbëjnë futbollistë të vegjël nga të gjitha vendet e origjinës, Shqipëri, Kosovë, Maqedoni, Luginë të Preshevës, Mal të Zi.

Për grumbullimin e katër ekipeve të Kosovës ishte përkujdesur Pajazit Sopi.

Ekipi i vajzave nga Kosova kishte fituar vendin e parë vitin e kaluar në këtë botëror të vogël që mbahet në Cyrih të Zvicrës, për të shtatën herë me radhë.

Sido që të jetë, ia vlen të jeni pjesë e kësaj feste të futbollit më 2 dhe 3 korrik në Cyrih. Ky kompeticion ka karakter të një kampionati botëror të futbollistëve të vegjël.

Ndoshta tifozët Kuq e Zi nuk do të mungojnë as në këtë kampionat.

http://www.mundialito.ch/