Shqipëria ka miratuar një rregullore që përafron kërkesat teknike për mjetet hekurudhore me standardet e Bashkimit Evropian, duke vendosur kritere për sigurinë, funksionimin dhe kushtet e udhëtimit me tren, transmeton albinfo.ch.
Urdhri nr. 201, i nënshkruar nga ministri i Infrastrukturës dhe Energjisë, Enea Karakaçi, dhe i botuar në Fletoren Zyrtare, përcakton standardet që duhet të plotësojnë lokomotivat, vagonët e udhëtarëve dhe kategoritë e tjera të mjeteve hekurudhore që përfshihen në rregullore.
Kërkesat përfshijnë strukturën e mjeteve, sistemet e frenimit, dyert, pajisjet e komandimit dhe kontrollit, si dhe sistemet e sigurisë. Rregullorja trajton gjithashtu kushtet që lidhen me shëndetin e udhëtarëve dhe personelit, si dhe aksesueshmërinë për personat me aftësi të kufizuara ose me lëvizshmëri të kufizuar.
Në fushën e zbatimit përfshihen trenat vetëlëvizës me motorë elektrikë ose termikë, lokomotivat, vagonët e udhëtarëve dhe mjetet speciale që përdoren për ndërtimin, mirëmbajtjen dhe inspektimin e infrastrukturës hekurudhore.
Për mjetet e reja, kërkesat do të zbatohen kur ato të futen në shërbim pas hyrjes në fuqi të rregullores. Ndërkaq, mjetet që janë tashmë në përdorim nuk do t’i nënshtrohen automatikisht të gjitha kërkesave të reja. Për to, zbatimi parashikohet në rastet e rinovimit, përmirësimit ose zgjerimit të zonës së përdorimit, sipas kushteve të përcaktuara në akt.
Rregullorja parashikon gjithashtu matjen në bord të konsumit të energjisë elektrike për mjetet që operojnë në rrjete të pajisura me sistemin përkatës të mbledhjes së të dhënave.
Për zbatimin e urdhrit janë përgjegjës Autoriteti i Sigurisë Hekurudhore, administratorët e infrastrukturës dhe sipërmarrësit hekurudhorë.
Megjithatë, miratimi i kësaj rregulloreje përcakton kuadrin teknik për mjetet hekurudhore dhe nuk përbën vendim për blerjen e trenave të rinj apo për caktimin e datave të nisjes së shërbimeve të reja hekurudhore./Albinfo.ch
