Milan Radoiçiq, i cili ka marrë përgjegjësinë për sulmin e armatosur në Banjskë më 2023, është shfaqur në një tubim parazgjedhor të Partisë Përparimtare Serbe në Kragujevc të Serbisë, përcjell albinfo.ch.
Pamjet e publikuara nga mediat serbe e tregojnë atë në mesin e pjesëmarrësve, pranë Danilo Vuçiqit, djalit të ish-presidentit serb Aleksandar Vuçiq.
Radoiçiq është një nga personat kryesorë të akuzuar për sulmin e 24 shtatorit 2023 në Banjskë të Zveçanit, ku u vra rreshteri i Policisë së Kosovës, Afrim Bunjaku.
Gjatë përplasjes mes policisë dhe grupit të armatosur serb, tre pjesëtarë të grupit u vranë, ndërsa disa të tjerë u arrestuan. Pjesa tjetër u largua drejt Serbisë. Autoritetet e Kosovës e kanë cilësuar sulmin si përpjekje për destabilizimin e vendit dhe aneksimin e veriut të tij.
Pavarësisht se Radoiçiqi e ka pranuar përgjegjësinë për organizimin e sulmit, ai vazhdon të jetë në Serbi, ku u mor në pyetje nga autoritetet në vitin 2023 dhe më pas u lirua.
Në prill të vitit 2026, Gjykata Themelore në Prishtinë dënoi me burgim të përjetshëm Blagoje Spasojeviqin dhe Vladimir Toliqin, ndërsa Dushan Maksimoviqin e dënoi me 30 vjet burgim, në kuadër të procesit gjyqësor për sulmin në Banjskë.
Të tre janë në mesin e 42 personave të akuzuar në këtë rast, përfshirë Radoiçiqin. Autoritetet e Kosovës kanë kërkuar që personat e dyshuar për përfshirje në sulm të përballen me drejtësinë./Albinfo.ch
