“Shqiponjat” përballë “3 Luanëve”

Kuqezinjtë sonte do të përballen me Anglinë në Tiranë

Shqipëria do të ndeshet sonte me Anglinë nga ora 18:00 në Tiranë, në kampanjën kualifikuese për Kampionatin Botëror “Katar 2022”. Për kuqezinjtë do të mungojë Marash Kumbulla, për shkak të lëndimit. Të dy kombëtaret e kanë nisur me fitore, kurse kjo shihet si një sfidë shumë e vështirë për kombëtaren shqiptare, shkruan albinfo.ch.

Trajneri Edy Reja ka folur para kësaj sfide. “Motivimi është shumë i madh, nuk është vetëm vëmendja e madhe dhe pjekuria me të cilat duhet ta përballojnë këtë ndeshje. Duhet të jemi të fortë fizikisht, sepse Anglia ka lojtarë shumë të shpejtë, sidomos anësorët. Më shumë se motivimi, duhet të luajmë me mendje në kokë. Duhet të mendojmë përveçse për mbrojtjen, edhe për fazën sulmuese”, ka thënë trajneri italian.

“Anglia është një ekip shumë i mirë, një nga më të mirat në botë, presioni nuk është aq i lartë, jo aq sa ndeshjet e tjera, sikurse ndaj kundërshtarëve të drejtpërdrejtë. Do të mundohemi t’ia bëjmë të vështirë, që të dalim edhe me pikë”, është shprehur Etrit Berisha.

Anglia kundër Shqipërisë, do të jetë pa disa prej lojtarëve më të talentuar, siç janë Marcus Rashford, Bukayo Saka, por edhe Jordan Henderson, që është dëmtuar që në fund të shkurtit, megjithatë trajneri i “3 Luanëve”, Gareth Southgate, në konferencë nuk u shfaq shumë i shqetësuar, sepse alternativat që ai ka janë të afta të mbulojnë çdo mungesë.

“Mason Mount dhe Declan Rice mund të jenë dyshja e mesfushës kundër Shqipërisë, ata bënë një paraqitje shumë të mirë kur luajtën së bashku ndaj Islandës. Nuk është fiks pozicioni që Mount luan me skuadrën e tij, por besoj se është i aftë të luajë aq thellë. Ai mund të luajë si një numër 4, si një 8-sh, por edhe si një numër 10. Po ashtu edhe Ward-Prose-in e pashë mirë ndaj San Marinos, edhe Philips është në formë të mirë, kështu që nuk jam i shqetësuar aspak. Rashford e kemi patur vetëm për një ndeshje e gjysmë nga shtatori deri më tani, kështu që mungesa e tij ka qenë një mundësi më tepër për të tjerët”, deklaroi Southgate.

---