Shqiptarët dhe romët, me numrin më të madh të azilkërkuesve

“Shkalla e lartë e papunësisë shtyn para së gjithash romët dhe shqiptarët etnikë që të shkojnë në vendet e BE-së për të gjetur punë dhe për të shfrytëzuar shërbimet sociale"

Të dhënat më të reja nga raporti mbi azilin, i përpiluar nga Zyra për Azil në BE tregojnë se numri i azilkërkuesve nga Ballkani Perëndimor gjatë vitit 2013 ka qenë dukshëm më i lartë se ai i atyre nga Siria. Kjo edhe përkundër faktit se ballkanasit kanë fare pak ose aspak gjasa për të fituar azilin.

72.840 qytetarë nga shtetet e Ballkanit, kryesisht nga Serbia, Kosova, Maqedonia dhe Shqipëria kanë kërkuar azil në vendet e BE-së. Kosova është vendi i vetëm nga ky regjion që nuk është liruar nga regjimi i vizave.

Fluksi i tillë i azilkërkuese paraqet ngarkesë para së gjithash për shtetet e vogla të BE-së thuhet në raport. Azilkërkuesit nga këto vende shkaktojnë ngarkesë të madhe në punën e autoriteteve përkatëse dhe nga ana tjetër “është fare evidente se kërkesa e tyre për azil është e pabazë”.

Më tutje në raport thuhet se vetëm 3.8% e kërkesave për azil nga vendet e ish Jugosllavisë marrin përgjigje pozitive. Ndërsa në Gjermani kjo përqindje është edhe më e vogël, sidomos për faktin se ky vend ka shpallur me ligj si vende të sigurta shtetet e Ballkanit. Kjo mundëson përpunimin e shpejtë të lëndëve dhe përgjigjen pothuaj secilën herë negative.

Sipas autoriteteve evropiane të azilit, motivi kryesor për kërkim azili nga popullata e këtyre vendeve është varfëria “Shkalla e lartë e papunësisë shtyn para së gjithash romët dhe shqiptarët etnikë që të përpiqen të shkojnë në vendet e BE-së për të gjetur punë dhe për të shfrytëzuar shërbimet sociale të atjeshme. Në rate të veçuara këta persona kërkojnë mbrojtje nga kërcënimet e gjakmarrjes”, shkruan nachrichten.at. Valët e migracionit janë veçanërisht masive para fillimit të dimrit.

Gjatë vitit 2013 në vendet e Bashkimit Evropian kanë kërkuar azil 435 mijë persona. Pas shtetasve të vendeve ballkanike (me 72.840 kërkesa), vijnë në radhë sirianët me më shumë se 50 mijë.