Shqiptarët nderojnë Lidhjen e Prizrenit

134-vjetori i Lidhjes Shqiptare të Prizrenit përkon edhe me kremtimin e 100-vjetorit të themelimit të shtetit të pavarur shqiptar

　

Personalitete nga të gjitha viset shqiptare kanë shënuar 134-vjetorin e Lidhjes Shqiptare të Prizrenit

　

Përfaqësues nga të gjitha viset shqiptare kanë marrë pjesë të dielën në Prizren për të shënuar 134-vjetorin e Lidhjes Shqiptare të Prizrenit, ndërsa kanë përkujtuar edhe figurat e asaj periudhe, Abdyl Frashërin, Ymer Prizrenin, Sylejman Vokshin etj.

　

Kryeministri i Shqipërisë, Sali Berisha, Lidhjen Shqiptare të Prizrenit e ka cilësuar mrekullinë më të madhe shqiptare të të gjitha kohërave. “Në këtë ngjarje, personalitetet shqiptare u mblodhën me qëllimin për një komb një qëndrim, ndaj Lidhja e Prizrenit shënon ngjarjen më kulmore pas luftërave të Skënderbeut”, ka thënë Berisha.

　

Ai po ashtu tha se ka ardhur koha që të hiqet ideja e fobisë së fqinjëve kundër shqiptarëve.

　

Kryeministri i Kosovës, Hashim Thaçi, ndërkaq tha se Lidhja e Prizrenit me përfaqësuesit e të gjitha viseve shqiptare ishte organizata më e rëndësishme politike e asaj periudhe në të cilën u vunë themelet e ndërgjegjes kombëtare.

　

“Pavarësia e Kosovës në shekullin XXI e korrigjoi padrejtësinë historike ndaj shqiptarëve, duke i dhënë kuptim edhe Lidhjes së Prizrenit dhe Pavarësisë së Shqipërisë, duke e forcuar kështu gjithë kombin shqiptar”, ka thënë Thaçi, i cili duke përkujtuar kontributin e prizrenasve edhe në luftën e fundit të UÇK-së.

　

134-vjetori i Lidhjes Shqiptare të Prizrenit përkon edhe me kremtimin e 100-vjetorit të themelimit të shtetit të pavarur shqiptar. Lidhja Shqiptare e Prizrenit zyrtarisht filloi me tubimin e 300 përfaqësuesve të të gjitha krahinave shqiptare në kuvendin shqiptar të mbajtur në Prizren më 10 qershor 1878. Qëllimi i takimit ishte formimi i një shteti autonom shqiptar që do të mbulonte vilajetet osmane të Prizrenit, Shkodrës, Manastirit dhe Janinës.

　

 

---