Shqiptari 24 vjeçar akuzohet për mbi 150 vjedhje me thyerje

Policia ka konstatuar se ai mund të jetë përgjegjës për së paku 150 plaçkitje banesash të realizuara nga 1 qershori 2015 deri më 29 dhjetor

Policia e Lucernit ka arrestuar një shqiptar të moshës 24 vjeçare, të dyshuar se vetëm gjatë shtatë muajve ka bërë mbi 150 vjedhje me thyerje në banesa të ndryshme. Vjedhjet kanë ndodhur në kantonet Aargau dhe Lucern.

Personi në fjalë është kapur në flagrancë nga policia e Lucernit më 29 dhjetor 2015, pasi që kishte hyrë për të plaçkitur një shtëpi, shkruan nlz.ch.

Ndërkohë, nga hetimet e policisë është konstatuar se ai mund të jetë përgjegjës për së paku 150 plaçkitje të tilla banesash, transmeton albinfo.ch. Ato i ka realizuar nga 1 qershori 2015 deri në ditën kur është arrestuar, pra më 29 dhjetor të po atij viti, ka bërë të ditur Policia e Kantonit të Lucernit sot.

Gjatë vjedhjeve me thyerje ai ka pasur në fokus shtëpitë private ndërsa ka vjedhur më shumë stoli dhe para të gatshme, përcjell albinfo.ch. Vlera e parave dhe gjësendeve të vjedhura llogaritet në disa qindra mijë franga, ndërsa dëmi i shkaktuar gjatë thyerjeve është së paku 250 mijë franga.