Shtajnbah: Kosova ka arritur stabilitetin e vet si shtet

Ambasadori Shtajnbah duke folur për çështjen e legjislacionit, vlerësoi lart punën e miratimit të ligjeve, sidomos nga Pakoja e Ahtisarit

Kryetari i Kuvendit, Jakup Krasniqi, ka pritur në një takim lamtumirës me ambasadorin e Gjermanisë në Prishtinë, Hans-Diter Shtajnbah, të cilin e ka falënderuar për ndihmën që dha në bashkëpunimin dhe mbështetjen e Kuvendit të Kosovës, si dhe të institucioneve tjera të vendit.　

Ai me këtë rast shprehu bindjen se bashkëpunimi shumë i mirë ndërmjet Kuvendit të Kosovës dhe Parlamentit të Gjermanisë do të vazhdojë të thellohet edhe në të ardhmen.　

Ambasadori Shtajnbah duke folur për çështjen e legjislacionit, vlerësoi lart punën rreth miratimit të ligjeve, sidomos nga Pakoja e Ahtisarit.　

Ambasadori gjerman u shpreh se Kosova tashmë ka arritur stabilitetin e vet si shtet.

Shtajnbah ka theksuar se marrëdhëniet në mes Gjermanisë dhe Kosovës janë shumë të mira dhe do të forcohen edhe më, njofton Zyra për media dhe marrëdhënie me publikun.