Shteti ka dështuar në mbrojtjen e grave

Sipas të dhënave zyrtare, vetëm vitin e kaluar janë shënuar 962 raste të dhunës në familje, ku viktima kanë qenë kryesisht gratë

Adelina Berisha, nga Rrjeti i Grupit të Grave të Kosovës, i tha Radios Evropa e Lirë se shteti ka dështuar në mbrojtjen e grave, të cilat kanë kërkuar ndihmë nga policia për shkak të dhunës sistematike në familje, e që ka çuar deri te vrasja nga bashkëshortët e tyre.

Ajo thotë se ndonëse nuk janë statistika zyrtare nga policia, janë mbi gjashtë vrasje këtë vit që kanë ndodhur si pasojë e dhunës në familje, e që viktima janë gratë.

“Ai ka qenë i paraburgosur një muaj për dhunë në familje dhe i njëjti është liruar pas një muaji. Sipas Kodit Penal, për lëndim trupor brenda familjes, dënimi është nga 6 muaj deri në 5 vjet. Nëse ai do të kishte qenë në paraburgim ashtu siç duhet, sot nuk i kishim pasur dy persona të vdekur. Mendoj se shteti i Kosovës ka dështuar”, tha Berisha, përcjell albinfo.ch.

Lidhur me vrasjen e dyfishtë në Gjakovë, presidenti i vendit, Hashim Thaçi, ka kërkuar që të merren masa ndaj atyre që kanë neglizhuar rastin.

Bajram Krasniqi, zyrtar për informim në Policinë e Kosovës, i tha Radios Evropa e Lirë, se gjatë këtij viti janë vrarë 20 persona, ku shihet një rritje nëse krahasohet me vitin e kaluar.

Krasniqi tha se Policia vetëm gjatë shtatë muajve të këtij viti ka konfiskuar 1300 armë të mbajtura ilegalisht.

Lirije Kajtazi, deputete, njëherësh zëvendëskryetare e Komisionit për të drejtat e njeriut, barazi gjinore dhe persona të pagjetur i tha Radios Evropa e Lirë se vrasësit nuk janë duke e marrë dënimin e merituar.

Sipas të dhënave zyrtare, vetëm vitin e kaluar janë shënuar 962 raste të dhunës në familje, ku viktima kanë qenë kryesisht gratë.