Ministri federal i punëve të brendshme Hans-Peter Friedrich i ka quajtur “alarmante” shifrat e përmendura dhe ka paralajmëruar se “këtë vit do të arrihet numri prej 100 mijë kërkesash të azilit në Gjermani.

Gjatë gjashtë muajve të parë të vitit 2013 Zyra Federale për Migracion dhe Refugjatë e Gjermanisë ka regjistruar gjithsej 43016 kërkesa azili. Dhe kjo ishte për 86.5 për qind më shumë se në gjysmëvjetorin e parë të vitit 2012.

Më së shumti azilkërkues vijnë nga regjioni i Çeçenisë, në Rusi, e në vendin e dytë janë azilkërkuesit nga Siria. Të tretët në radhë janë ata që vijnë nga Afganistani dhe në vendin e katërt azilkërkuesit nga Serbia.

Ndërkaq, në numrin e përgjithshëm të azilkërkuesve që aktualisht ndodhen në Gjermani, në vendin e parë janë shtetasit e Serbisë, gjithsej 8447 persona, të pasuar nga ata të Afganistanit, 7498. Shtetasit e Kosovës janë në vendin e dhjetë ose gjithsej 1906 persona ndërsa ata të Maqedonisüe, në të pestin, me 4546.

Kuotën prej 100 mijë azilkërkuesish Gjermania e kishte arritur së fundi në vitin 1999. Ndërsa në vitin 1995 në Gjermani ishin regjistruar 160 mijë kërkesa për azil.

Gjermania pranon më së shumti kërkesa azili në krahasim me vendet tjera të BE-së. Ndërsa nga të gjithë azilkërkuesit vetëm rreth 15 për qind e fitojnë azilin, njoftojnë mediet gjermane.