Shumë marrëveshje ekonomike, papunësia deri në 38 për qind

Ministrat e Kosovës nënshkruajnë shumë marrëveshje ekonomike, por papunësia në vend llogaritet deri në 38 për qind.

Shumë marrëveshje dhe pak rezultate. Ministrat e ndryshëm të Qeverisë së Kosovës thuajse ngado që shkojnë nënshkruajnë nga një marrëveshje. Me vendosjen e firmave të tyre, ata premtojnë zbutjen e papunësisë së lartë në vend. Por në terren situata e rëndë ekonomike duket se ka pak ndryshime. Edhe pas marrëveshjeve, shkalla e të papunëve mbetet e njëjtë, në shkallë mjaft të lartë. Të dhënat e fundit të Bankës Botërore tregojnë se Kosova ka deri në 34.5 për qind të papunë.

Ndërkohë, hiç më mirë nuk janë as shifrat që ofron Ministria e Punës dhe e Mirëqenies Sociale, e cila përmend edhe 38-përqindëshin.

Por çfarë ndodh me ato marrëveshje që nënshkruajnë ministrat, e për të cilat premtohet se do ta zbusin papunësinë e lartë në vend?

©albinfo.ch: Safet Gërxhaliu nga Oda Ekonomike e Kosovës (OEK)

Disa ekspertë, si Safet Gërxhaliu nga Oda Ekonomike e Kosovës (OEK), e cilësojnë si hap të mirë nënshkrimin e marrëveshjeve të tilla.

Ai konsideron se këto marrëveshje së paku ndikojnë pozitivisht në psikikën e investitorëve të huaj.

Por, ka të tjerë, sikurse Agron Demi nga Instituti GAP, që nënshkrimin e marrëveshjeve të tilla e cilëson si të pakuptimtë. Kjo për faktin se nga viti 2007 e deri më tash ai thekson se ka rënie të investimeve të huaja në Kosovë.

Ndërkohë Safet Gërxhaliu, kryetar i OEK-ut, ka deklaruar se shteti nuk duhet të jetë i orientuar vetëm të nënshkruajë marrëveshje, por ato duhet të kenë një platformë dhe substancë të implementimit. “Me të gjitha vendet që e kanë pranuar Kosovën si shtet të pavarur dhe sovran duhet të hyhet në dialog, sepse është një garanci edhe për forcimin e qëndrueshmërisë së shtetit të Kosovës dhe kuptohet që është një platformë shumë e mirë dhe për një partneritet shumë më të avancuar”, ka thënë Gërxhaliu.

Sipas tij, e tëra kjo ndikon që investitorë të ndryshëm të jenë të inkurajuar, duke shtuar se kjo ka efekt edhe në psikologjinë e investitorëve.

Por eksperti i ekonomisë, Agron Demi, nga Instituti GAP, shpreh shqetësimin për rënien e investimeve të huaja në Kosovë, duke thënë se që nga viti 2007 investimet direkte kanë shënuar rënie.

Ai thekson se në kohën kur Banka Botërore në nivel global tregon se Kosova është diku nga fundi i listës së vendeve më të favorshme për të bërë biznes, atëherë marrëveshjet me vendet e huaja janë thuajse të pakuptimta.

Demi është shprehur se niveli i lartë i korrupsionit dhe mungesa e sundimit të ligjit i bënë marrëveshjet dypalëshe të pazbatueshme.

“Askush nuk do të vijë në Kosovë të bëjë biznes kur nuk e ka të sigurt që kontratën që do ta nënshkruajë do të mund të zbatohet në praktikë në mungesë të efikasitetit të gjykatave”, është shprehur Demi.

Në tërë këtë situatë, edhe të dhënat zyrtare tregojnë një atmosferë jo të mirë të investimeve të huaja në Kosovë.

Raporti i fundit i Bankës Botërore e rendit Kosovën në vendin e 118-të si vend për të bërë biznes, duke përmendur barrierat e shumta që kanë bizneset e vendit, por edhe ato të huaja.

---