Si duket aeroporti më i madh në botë (Video)

Të hënën, më 29 tetor, aeroporti më i madh në botë do të hapet në Stamboll. Do të jetë aeroporti i tretë në këtë qytet turk me miliona banorë.

Aeroporti i ri i Stambollit “Yeni Havalimani” është ndërtuar në anën evropiane të Stambollit, 35 km në veri të qytetit, në rrethin e Arnaututkaya. Ndërtimi i tij filloi në qershor 2014 dhe tani ka përfunduar e para nga katër fazat e ndërtimit. Në fazën e parë parashikohet që aeroporti të marrë 90 milionë pasagjerë.

Pritet që nga 2030 të mund të përdoret nga 150 milionë pasagjerë në vit, sapo të përfundojë faza përfundimtare. Për krahasim, aeroporti më i ngarkuar në botë “Hartsfield Jackson” në Atlanta, Shtetet e Bashkuara, më 2017 kishte 105 milionë pasagjerë. Gjithashtu, gjashtë aeroportet në Londër shërbejnë më shumë se 150 milionë pasagjerë në vit.

Ndërtimi i aeroportit kushtoi 10.5 miliardë euro. Do të mbulojë një sipërfaqe prej 7.659 hektarësh, që është rreth 76 kilometra katrorë dhe do të ketë gjashtë pista. Në aeroportin e ri do të ndërtohet kompleksi më i madh shitoresh në botë, pa detyrime doganore.