Si po përballen burgjet zvicerane me rritjen e numrit të të burgosurve të moshuar

(KEYSTONE/Peter Klaunzer)

Të burgosurit mbi 60 vjeç përbëjnë vetëm rreth 6% të popullsisë së burgjeve në Zvicër, por janë grupmosha që është rritur më së shumti gjatë 40 viteve të fundit. Mes nevojës për siguri dhe përkujdesje, institucionet korrektuese zvicerane po përballen me sfidën e përshtatjes ndaj kësaj kategorie, ku disa prej tyre do të mbeten pas hekurave deri në fund të jetës.

Georges* ishte mbi 70 vjeç kur u burgos në Champ-Dollon dhe më pas në La Brenaz, në Gjenevë, ku qëndroi për më shumë se një vit. “Në këto burgje krijohet një hierarki e fortë,” rrëfen ai për emisionin Mise au Point. “Ekziston një grup me një lider që kontrollon gjithçka.”

Ai dëshmoi për një rast përdhunimi në dushet e burgut. “Roja kishte mbyllur dyert pasi ishte aktivizuar alarmi,” kujton ai. “Në fund, lideri i tyre m’u afrua dhe më tha: ‘Ke fat që je shumë i moshuar për gjëra të tilla. Por mos i trego askujt, përndryshe nuk do të jetosh gjatë.’ Ishte një tronditje e tmerrshme.”

Georges ishte gjithashtu viktimë e një tentative shantazhi: një i burgosur e kërcënoi se do t’i dëmtonte familjen nëse nuk i paguante 4000 franga në muaj, transmeton albinfo.ch.

Përkujdesja ndaj të burgosurve: një sfidë në rritje me moshën

Të moshuarit në burgje janë më të rrezikuar ndaj kërcënimeve dhe ngacmimeve. Por njëkohësisht, sigurimi i kujdesit të duhur për ta mbetet i vështirë.

Sipas Hans Wolff, president i Konferencës Zvicerane të Mjekëve të Burgjeve, “sot, dinjiteti i të burgosurve mbi 60 vjeç nuk është i garantuar”.

Kjo për shkak se plakja në burg përshpejtohet. Vlerësohet se një i burgosur 60-vjeçar ka probleme fizike dhe mendore të ngjashme me ato të një 70-vjeçari në liri. “Këta individë shpesh vijnë nga kushte të vështira socio-ekonomike,” shpjegon Wolff. “Ata vuajnë më shumë nga varësitë dhe sëmundjet infektive dhe kanë dhjetë herë më shumë gjasa të preken nga çrregullime mendore.”

Burgje të papërshtatshme për të moshuarit

Edhe pse përbëjnë vetëm 6% të të burgosurve, kjo është grupmosha me rritjen më të shpejtë — numri i tyre është gjashtëfishuar në katër dekadat e fundit.

“Dinjiteti i të burgosurve mbi 60 vjeç nuk është gjithmonë i garantuar, madje në disa raste as nuk respektohet, sidomos në burgjet e mbipopulluara,” pranon Wolff. “Burgjet zvicerane nuk janë ndërtuar për një popullatë geriatrike. Autoritetet e kanë njohur problemin dhe po punojnë për zgjidhje, por institucionet në Zvicrën frankofone dhe në Ticino janë më pak të pajisura krahasuar me ato në Zvicrën gjermanofolëse.”