Si po përgatitet Zvicra për të shmangur sulmet kibernetike ruse

Rusia thuhet se është e zemëruar për mbështetjen e Zvicrës neutrale ndaj masave të BE-së

Sanksionet e Këshillit Federal kundër Rusisë pas shpërthimit të luftës në Ukrainë e ekspozojnë Zvicrën ndaj masave hakmarrëse në hapësirën kibernetike, sipas një raporti nga transmetuesi publik RTS, përcjell albinfo.ch.

Rusia thuhet se është e zemëruar për mbështetjen e Zvicrës neutrale ndaj masave të BE-së dhe madje e vendosi vendin në listën e zezë të kombeve armike.

Kjo është një sfidë e re për Zvicrën, e cila nuk është pushtuar në mënyrë konvencionale për më shumë se 220 vjet dhe nuk ka luftuar në një konflikt të armatosur kundër një shteti tjetër edhe më gjatë se kaq.

Por tani, “mund të presim që autoritetet dhe institucionet financiare [zvicerane] të ekspozohen dhe të shënjestrohen veçanërisht nga sulmuesit”, paralajmëroi Qendra Kombëtare e Sigurisë Kibernetike (NCSC).

Çfarë është saktësisht sulmi kibernetik dhe si do të ndikonte një veprim i tillë kundër Zvicrës?

Në terma të përgjithshëm, kjo do të thotë se hakerët dëmtojnë, çaktivizojnë ose shkatërrojnë një rrjet ose sistem kompjuterik.

Ata mund të vjedhin informacione personale në lidhje me llogaritë bankare, kartat e kreditit, historinë shëndetësore dhe një gamë të gjerë detajesh të tjera të ndjeshme.

Është mjaft keq kur kjo u ndodh individëve, grupeve apo bizneseve. Por imagjinoni shkallën e dëmit nëse hakerët mbyllin infrastrukturën thelbësore qeveritare dhe civile, duke ndërprerë sistemet kritike si rrjetet e energjisë.

Kjo mund të shkaktojë ndërprerje elektrike, të paralizojë telekomit, spitalet dhe operacione të tjera jetike. /Albinfo.ch

 

---