Sinan Bytyqi tregon për jetën jashtë fushës së gjelbër

Në një intervistë për Marca, ish-futbollisti tregon jetën e tij të re

Njëri nga futbollistët më të talentuar shqiptar konsiderohej Sinan Bytyqi. Ai ishte pjesë e akademisë së klubit të madh anglez, Manchester City, derisa më vonë u huazua në Holandë.

Por, ai kishte probleme me zemër dhe u detyrua të tërhiqej nga futbolli. Atë e diagnostikuan me një miokardiopati hipertrofike, një sëmundje e zemrës që shkakton zmadhim të një pjese të mureve të muskujve të saj, duke shkaktuar aritmi. I thanë se nëse do të vazhdonte të luante futboll, kishte 4% rrezik vdekjeje. Kështu, Sinan Bytyqi u detyrua të varte këpucët në gozhdë në moshën 22-vjeçare.

Në një intervistë për Marca, ish-futbollisti tregon jetën e tij të re, përcjell albinfo.ch.

“Merrem me lojtarët që Manchester City ka huazuar nëpër botë. Jemi një skuadër prej gjashtë personash dhe detyra ime është ajo e vëzhgimit. Unë i mbështes, i ndihmoj dhe në fund bëj një raport për paraqitjen e tyre në fushë”, thotë Bytyqi.

22-vjeçari ka pasur fatin të jetë për një muaj nën urdhrat e Pep Guardiolës. “Ishte fazë përgatitore dhe kam mësuar më shumë në atë muaj sesa në të gjithë karrierën time. Kur të vinte një pasim, Guardiola të thonte si duhej të ndaloje topin dhe të paraqiste situata të ndryshme loje në varësi të ndalimit të topit. Kjo nuk ndodh me trajnerët e tjerë”, theksoi Bytyqi.