Skiatorët francezë ‘ndalohen’ të shkojnë në Zvicër

Franca do të marrë masa për të ndaluar skiatorët të shmangin kufizimet lokale të virusit dhe të shkojnë në vendet e tjera gjatë pushimeve të Krishtlindjeve

Presidenti Emmanuel Macron e bëri njoftimin të martën. Të mërkurën në mëngjes kryeministri francez Jean Castex shtoi njoftimin se banorët francezë që shkojnë jashtë për të skijuar do të duhet të vetizolohen për 7 ditë në kthim dhe se kontrollet kufitare do të rriten në zona të caktuara.

“Objektivi është të parandalojmë që francezët të infektohen jashtë vendit”, tha Castex, shkruajnë mediat zvicerane, përcjell albinfo.ch.

Skijimi është ndaluar në mënyrë efektive në Francë për sezonin dimëror për të ndihmuar në frenimin e përhapjes së Covid-19 pasi qeveria tha javën e kaluar se ashensorët e skive do të qëndronin të mbyllura deri në janar, edhe pse vendpushimet mund të funksiononin ndryshe.

Shpatet janë të hapura në Zvicrën fqinje, duke joshur adhuruesit francezë të sporteve dimërore të kalojnë kufirin nga 15 dhjetori, kur hiqet bllokimi aktual i pjesshëm.

“Nëse ka vende që mbajnë vendpushimet e tyre të hapura, do të ketë kontrolle për të dekurajuar francezët”, tha Macron në një konferencë shtypi, përcjell tutje albinfo.ch.

Kjo ishte për të shmangur “krijimin e një situate në të cilën ka një çekuilibër me stacionet në Francë”, tha ai.

Gjermania dhe Franca kanë kërkuar një ndalim në gjithë BE-në për ski gjatë Krishtlindjeve.

Italia dhe Spanja ende nuk kanë vendosur. Zvicra – jo një anëtare e BE-së, megjithëse ka lidhje të forta me bllokun – ka injoruar thirrjet për të rënë në vijë, për të zhgënjyer zyrtarët francezë.

“Në Zvicër ne mund të shkojmë për skijim, me planet e mbrojtjes në vend”, tha ministri zviceran i Shëndetësisë, Alain Berset, javën e kaluar.

Sektori i sporteve dimërore të Francës thotë se gjeneron rreth 11 miliardë euro (13 miliardë dollarë) të ardhura në vit dhe punëson 120,000 njerëz gjatë sezonit.

---