Sot dihet saktë numri i aplikimeve nga diaspora

KQZ-ja ka bërë të ditur se sot pritet të përmbyllet regjistrimi dhe verifikimi i aplikacioneve të votuesve jashtë Kosovës. Megjithëkëtë, Komisioni Qendror i Zgjedhjeve ende nuk ka një numër të saktë se sa aplikacione të diasporës janë të konfirmuara, transmeton albinfo.ch.

Zëdhënësi i KQZ-së, Valmir Elezi, tha se përmes një raporti të detajuar do të dihet saktë për votuesit me postë.

“Shërbimi votues është në pëmbyllje e sipër të periudhës së regjistrimit dhe verifikimit të aplikacioneve për t’u regjistruar si votues jashtë Kosovës. Gjatë ditës së sotëme do të kemi një raport të detajuar se sa është numri i aplikacioneve, të cilat janë pranuar deri më 21 janar, sa prej tyre janë aprovuar dhe sa janë refuzuar”, tha ai.

Krahas kësaj, Elezi bëri të ditur se më 2 shkurt për aplikacionet e konfirmuara pritet të fillojë procesi i votimit me postë.

“Të gjithë qytetarët që arrijnë të regjistrohen suksesshëm si votues jashtë vendit, pasi kanë plotësuar kriteret ligjore, do të mund të votojnë përmes postës duke filluar nga data 2 shkurt.

Fletëvotimet duhet të pranohen nga KQZ-ja deri më 12 shkurt. Po ashtu, sot do të kemi edhe të dhëna nga qendra e thirrjeve lidhur me verifikimin e aplikuesve përmes telefonimit të tyre dhe se deri ku ka shkuar ky proces”, tha ai. /Albinfo.ch