Sot, filloi vaksinimi në Cyrih dhe në nëntë kantone të tjera

Fushata e vaksinimit kundër virusit corona filloi të hënën në kantonin e Cyrihut. Edhe 9 kantone të tjera kishin planifikuar të fillonin vaksinimin të njëjtën ditë

Qytetarët e parë të Kantonit të Cyrihut, burrë e grua Stuessi nga Wetzikon-i, janë vaksinuar sot kundër koronavirusit Covid-19, në qendrën e vaksinimit të referencës EBPI në Hirschengraben në Cyrih.

Vaksinimi i tyre ka shërbyer si fillim zyrtar, para mediave, i fushatës së vaksinimit në kanton.

Dy të vaksinuarit e parë janë mbi 75 vjeç dhe kështu i përkasin grupit me rrezik të lartë, shkruan sda.

Kërkesa për vaksinim deri më tani ka qenë shumë e madhe kështu që jo të gjithë të interesuarit mund të marrin termin për t`u vaksinuar, transmeton albinfo.ch. Deri më tani, në Kantonin e Cyrihut  janë në dispozicion vetëm 16,000 doza të vaksinës Pfizer / Biontech . Ky numër është i mjaftueshëm për të vaksinuar 8,000 njerëz.

Vaksinimet e të moshuarve në shtëpitë e pleqve do të fillojnë në mes të janarit. Disa qendra vaksinimi janë planifikuar po ashtu për publikun e gjerë dhe pritet të fillojnë të funksionojnë në prill.

Përveç kantonit të Cyrihut, të hënën vaksinimi ka filluar edhe në kantonet e Uri, Obwalden, Ticino, Jura, Graubünden, St. Gallen, Glarus, Appenzell-Ausserrhoden dhe Thurgau.

Në ditët e fundit të vitit të kaluar, vaksinimin kundër koronavirusit e patën filluar 3 kantone, përcjell albinfo.chBerna është kantoni i fundit në këtë drejtim. Ky kanton ka njoftuar fillimin e vaksinimeve për 11 janar.

---