Gjashtë persona kanë humbur jetën dhe 15 të tjerë janë plagosur si pasojë e një sulmi me armë zjarri që ndodhi të shtunën, më 7 nëntor, në qendër të qytetit të Krakovit në Poloni, përcjell albinfo.ch.
Sipas autoriteteve policore polake, sulmi ndodhi rreth orës 15:00 në sheshin kryesor të qytetit, ku një person që po lëvizte me automjet hapi zjarr ndaj kalimtarëve. Bilanci fillestar prej pesë viktimash u rrit më vonë në gjashtë, ndërsa numri i të plagosurve arriti në 15.
Policia ka bërë të ditur se mes viktimave janë katër gra dhe dy burra. Në mesin e të plagosurve ndodhen edhe dy pjesëtarë të policisë, njëri prej të cilëve është në gjendje të rëndë shëndetësore.
Autori i dyshuar, një shtetas polak, ishte i veshur me rroba të stilit ushtarak dhe kishte përdorur një armë të gjatë zjarri. Ai u plagos gjatë shkëmbimit të zjarrit me policinë, u arrestua dhe më pas u dërgua në spital.
Gjatë kontrollit të automjetit të tij, autoritetet gjetën armë të tjera dhe municion. Policia ka njoftuar se sulmuesi dyshohet se ka vepruar i vetëm, ndërsa motivet e sulmit ende nuk janë bërë të ditura.
Kryeministri polak, Donald Tusk, ka deklaruar se po informohet vazhdimisht për situatën dhe se policia po heton të gjitha rrethanat e ngjarjes. Edhe presidenti Karol Nawrocki ka shprehur ngushëllime për familjarët e viktimave dhe solidaritet me të plagosurit.
Ngjarja ka shkaktuar panik në qendrën historike të Krakovit, një nga zonat më të frekuentuara turistike të Polonisë. Forca të shumta policore dhe ekipe të emergjencës janë angazhuar në vendin e ngjarjes, ndërsa hetimet po vazhdojnë.
