Superliga e Zvicrës është pezulluar, Kololli shënon gola në miqësore

Për shkak të koronavirusit, ndeshjet e Superligës së Zvicrës në futboll nuk janë duke u zhvilluar. Masa e pezullimit të ndeshjeve është në fuqi deri më 23 mars.

Së fundi ndeshje të kampionatit helvetik janë luajtur më 22 e 23 shkurt. Janë shtyrë ndeshjet e tri xhirove, ndërsa shtyrje të tjera nuk përjashtohen. Pushimin e detyrueshëm skuadrat zvicerane po e shfrytëzojnë për të luajtur ndeshje miqësore. Ndeshjet luhen pa shikues.

Të shtunën një miqësore e kanë luajtur Luzerni e Cyrihu.

Cyrihu fitoi me rezultatin 5:0, ndërsa formë të lartë në këtë takim miqësor ka treguar reprezentuesi i Kosovës, Benjamin Kololli. Ai shënoi dy gola.

Për Cyrihun pos Kolollit tërë ndeshjen luajti edhe reprezentuesi tjetër i Kosovës, Hekuran Kryeziu. Mirlind Kryeziu u aktivizua në minutën e 65-të, njëjtë si Toni Domgjoni.

Te Luzerni luajtën Shkëlqim Demhasaj e Lorik Emini, ndërsa mungoi Idriz Voca, përcjell Albinfo.ch.