Institucionet e Kosovës kanë identifikuar 155 raste aktive me rrezikshmëri të lartë të dhunës, të cilat do të trajtohen me vëmendje të veçantë. Këtë e ka bërë të ditur ministri i Punëve të Brendshme, Xhelal Sveçla, në një konferencë të përbashkët me ministren e Drejtësisë, Donika Gërvalla, lidhur me rastin e vrasjes së Arlinda Zekajt, përcjell albinfo.ch.
Sveçla ka theksuar se Arlinda Zekaj kishte kërkuar mbrojtje para se të vritej, ndërsa ka nënvizuar se përgjegjësia institucionale nuk përfundon vetëm me hetimin e këtij rasti, por përfshin edhe parandalimin e tragjedive të tjera.
“Arlinda kërkoi mbrojtje. Sot përgjegjësia jonë është që të sigurohet që çdo veprim apo mosveprim të hetohet”, ka deklaruar ai.
Ministri ka bërë të ditur se, me kërkesë të kryeministrit Albin Kurti, është përpiluar një raport i veçantë për rastet aktive me rrezikshmëri të lartë, ku janë evidentuar gjithsej 155 raste.
Ai ka theksuar se këto raste duhet të trajtohen me seriozitetin dhe vëmendjen e duhur nga institucionet përgjegjëse, në mënyrë që të sigurohet reagimi i nevojshëm ndaj situatave që paraqesin rrezik për jetën dhe sigurinë e viktimave.
“Përtej veprimeve, përgjegjësia jonë është që të gjitha rastet e tjera të identifikuara të trajtohen me seriozitetin dhe vëmendjen e duhur institucionale”, ka thënë Sveçla.
Deklaratat vijnë në kohën kur rasti i Arlinda Zekajt ka vënë në qendër të vëmendjes reagimin e institucioneve ndaj rasteve të dhunës në familje dhe paralajmërimeve për rrezik ndaj jetës së viktimave./Albinfo.ch
