Ministrja e Drejtësisë, Donika Gërvalla, ka bërë të ditur se raporti për rastin e vrasjes së Arlinda Zekajt i është dorëzuar kryeministrit, duke evidentuar mangësi serioze dhe vonesa në veprimet e institucioneve përgjegjëse, pavarësisht paralajmërimeve për rrezikun ndaj jetës së saj, përcjell albinfo.ch.
Raporti i hartuar nga Zyra e Koordinatores për Familje, Dhunën ndaj Grave dhe Dhunën me Bazë Gjinore përfshin periudhën nga 10 korriku 2026, kur Arlinda Zekaj raportoi për herë të parë dhunën, deri më 25 tetor, ditën kur u vra, raporton albinfo.ch.
Sipas Gërvallës, dokumentacioni i shqyrtuar deri më tani nxjerr në pah mangësi serioze në trajtimin e rastit. Megjithatë, raporti ende nuk është i plotë, pasi disa institucione nuk i kanë dorëzuar të gjitha dokumentet dhe sqarimet e kërkuara.
“Arlinda Zekaj nuk u vra pa paralajmërim. Institucionet përgjegjëse kishin marrë paralajmërime serioze për rrezikun ndaj jetës së saj”, ka deklaruar ministrja, duke theksuar nevojën për dokumentacion dhe informacione shtesë.
Sipas të dhënave të prezantuara nga Gërvalla, më 10 korrik 2026, Zekaj ishte paraqitur në polici për të raportuar dhunë fizike dhe psikologjike nga bashkëshorti i saj. Ajo kishte denoncuar gjithashtu kërcënime dhe kishte njoftuar autoritetet se bashkëshorti posedonte një armë me leje.
Përveç dhunës së raportuar, Zekaj kishte deklaruar se, ndonëse ishte bashkëpronare e shtëpisë, bashkëshorti dhe familjarët e tij po e pengonin të hynte në pronën e saj.
Më 7 shtator, ajo kishte kërkuar mbrojtje emergjente në Gjykatën Themelore në Pejë. Po atë ditë, sipas ministres, i kishte dërguar gjykatës një mesazh ku shprehte frikën për jetën e saj.
Rasti ka rikthyer vëmendjen te përgjegjësia e institucioneve në trajtimin e rasteve të dhunës në familje dhe rëndësia e reagimit në kohë ndaj paralajmërimeve për rrezik. Raporti pritet të plotësohet me dokumentacionin dhe sqarimet që ende mungojnë nga institucionet përkatëse. /Albinfo.ch
