“Swiss Air” i Zvicrës ndërpren fluturimet për në Stamboll

Që nga dimri i ardhshëm kompania ajrore zvicerane “Swiss Air” do të ndërpresë fluturimet nga Cyrihu drejt Stambollit. E gjitha kjo për shkak të rënies së kërkesave, pasigurisë në vend dhe luftës së çmimeve.

Stambolli ishte menduar si një nga top destinacionet e Evropës. Vitin e kaluar kanë udhëtuar 12.6 milionë turistë nga e gjithë bota në metropolin turk. Por, muajt e fundit situata e krijuar ka dëmtuar në masë të madhe imazhin e qytetit të Stambollit, shkruan “Blick”, përcjell albinfo.ch. Stambolli përsëri ishte cak i sulmeve terroriste.

Zëdhënësja e kompanisë më të njohur zvicerane, Meike Fuhlrott, ka thënë për “Tages – Anzeiger” se “situata e krijuar së fundmi dhe lufta e çmimeve me kompani të tjera ka bërë që Swiss Air nuk do të zhvillojë më dy fluturime në ditë drejt Turqisë”. Fluturimet parashihen të rifillojnë sërish në pranverën e vitit të ardhshëm.

Ashtu si Zvicra, edhe kompania ajrore austriake “Austria Airlines” ka ndërprerë fluturimet drejt Stambollit.