“SwissContact” ndihmon të funksionalizohet Kiosku për turistët

Pas shumë vjetësh qëndrimi i mbyllur dhe pa kujdes, është funksionalizuar Kiosku informativ për turistë në kryeqytet. Në të janë vendosur materiale informuese për objekte të trashëgimisë kulturore dhe destinacione të tjera atraktive për turistë, përcjell albinfo.ch.

“Hapja e kioskut është vetëm nismë, ky është një pilot projekt, muajin tjetër do të vendosim panelet informuese në pjesë të ndryshme të qytetit, ndërkohë po shohim mundësitë të hapin edhe kioske të tjera ose të bëjmë një qendër më të madhe turistike. Vitin tjetër synojmë të kemi logon turistike të kryeqytetit, të kemi uebfaqen për turistë dhe aplikacionin për turistë”, tha në hapje të qendrës drejtori i Kulturës, Yll Rugova.

Rifunksionalizimi i Qendrës për Turistë është bërë në një projekt të përbashkët të Komunës së Prishtinës me “SwissContact”-in.

Në fund, Rugova shtoi se shkak i hapjes së kioskut në shtator janë vonesat në procedurat e prokurimit për materialin informues.