SWISSCOY vazhdon mandatin në Kosovë deri në fund të vitit 2020

Por ashtu siç dhe ishte paralajmëruar, numri i ushtarëve në kuadër të këtij misioni do të zvogëlohet në mënyrë graduale deri sa në përmbyllje ai do të ulet në 165

Misioni ushtarak zviceran në Kosovë, Swisscoy do të qëndrojë deri në fund të vitit 2020. Këtë vendim e ka marrë sot Këshilli Federal në mbledhjen e tij.

Por ashtu siç dhe ishte paralajmëruar, numri i ushtarëve në kuadër të këtij misioni do të zvogëlohet në mënyrë graduale deri sa në përmbyllje ai do të ulet në 165, shkruan albinfo.ch. Megjithatë, sipas nevojës, mund të ketë ndonjë ngritje të përkohshme, periodike të numrit, e ka lënë të hapur qeveria.

Aktualisht misioni përbëhet nga maksimalisht 235 ushtarë ndërsa brenda tri viteve numri maksimal do të bjerë në 190, për të rënë në fund të vitit 2020 në 165. Këtë njoftim e ka dhënë sot Departamenti (Ministria) Federal i Mbrojtjes, VBS.

Stabiliteti i Ballkanit Perëndimor, parta së gjithash i Kosovës, ka rëndësi thelbësore për Zvicrën, shkruan VBS. Vazhdimi i pranisë së KFOR-it është në interes të sigurisë politike edhe të saj (Zvicrës), përcjell albinfo.ch njoftimin nga ministria. Po ashtu vazhdimi i angazhimit ushtarak të Zvicrës në të mirë të promovimit të paqes në Kosovë ndërlidhet edhe me vullnetin e shprehur tashmë shumë herë të Këshillit Federal për promovimin e paqes, me ndihmën edhe të ushtrisë.