Syri i Kaltër, burimi që të mahnit

Faqja italiane SiViaggia.it që prezanton turizmin në Itali dhe në botë, ia ka kushtuar një shkrim edhe Shqipërisë.

Kjo faqe është fokusuar te një fenomen natyror që nuk ka gjetur ende një shpjegim të vërtetë, por që është në mes të pyllit, vetëm disa kilometra larg Sarandës, e që është Syri i Kaltër, transmeton albinfo.ch.

“I kaltër si ngjyra e burimit natyral që gjendet në Shqipëri. Një fenomen që admirohet… Një vend shumë popullor në mesin e shqiptarëve, por pothuajse i panjohur për turistët, të cilët gjithnjë e më shumë e vizitojnë çdo vit vendin. Ujërat transparente të lumit – meritë edhe e gurëve të bardhë gëlqerorë – burojnë nga një thellësi prej më shumë se 50 metra. Zhytësit rregullisht zhyten në thellësi të tilla, por askush nuk ka qenë kurrë në gjendje të shpjegojë fenomenin e as çfarë qëndron në fund të rrjedhës së lumit”, thuhet në shkrim.

Syri i Kaltër është pjesa fillestare e burimit të lumit Bistricë, një lumë i gjatë prej 25 kilometrash që rrjedh në detin Jon në jug të Sarandës.