Të huajt në Zvicër marrin letra të rreme për “dëbim”

Autoritetet sqarojnë se dokumentet janë të falsifikuara dhe nuk kanë asnjë efekt juridik

Disa shtetas të huaj në Zvicër kanë raportuar se kanë pranuar letra të rreme, të cilat pretendojnë se janë dërguar nga Sekretariati Shtetëror për Migracionin (SEM), duke i informuar se duhet të largohen nga vendi deri më 31 dhjetor 2026, përcjell albinfo.ch.

Në këto dokumente thuhet se lejet e qëndrimit do të revokohen automatikisht si pasojë e iniciativës “Jo 10 milionëve”, e cila pritet të votohet më 14 qershor dhe ka në fokus kufizimin e migracionit.

Megjithatë, autoritetet zvicerane kanë reaguar duke konfirmuar se këto letra janë të falsifikuara dhe nuk kanë asnjë bazë ligjore apo ndikim në statusin e qëndrimit të personave që i kanë marrë ato.

Sekretariati Shtetëror për Migracionin (SEM) ka bërë të ditur se versione të ngjashme të këtyre letrave kanë qarkulluar edhe më herët dhe ka apeluar për kujdes ndaj dezinformatave që mund të shkaktojnë panik te qytetarët e prekur. /Albinfo.ch

---