Toyota thyen rekordin e shitjeve

Shitjet globale të Toyota Motor u rritën në korrik me 8%, krahasuar me të njëjtin muaj një vit më parë, duke arritur rekordin prej 859.506 makinash, deklaroi të mërkurën shtëpia automobilistike japoneze, një ditë pasi një mosfunksionim i sistemit mbylli prodhimin në të gjitha fabrikat vendase të montimit.

Në korrik, prodhuesi i automjeteve më të shitura në botë regjistroi gjithashtu një rritje prej 15% në prodhimin global.

Tani, Toyota regjistron rritje të shitjeve globale me bazë vjetore prej gjashtë muajsh me radhë dhe të prodhimit, prej shtatë muajsh, duke theksuar rimëkëmbjen nga vështirësitë e zinxhirit të furnizimit dhe masat e sigurisë nga Covid vitin e kaluar.

Të dyja shifrat e përfshijnë markën e makinave luksoze Lexus të Toyota.

Shifrat e gushtit, që do të publikohen muajin e ardhshëm, ka të ngjarë të ndikohen nga pezullimi i prodhimit të martën. Toyota rinisi punën në fabrikat e saj të montimit në Japoni të mërkurën, pas një defekti në sistem, që e pengoi atë të porosiste komponentë.

Kompania po vijon të hetojë shkaqet e mosfunksionimit, por deklaroi se kjo nuk erdhi nga ndonjë sulm kibernetik.

Në Kinë, shitjet ranë me 15% në korrik. Kjo shifër është në kontrast me shitjet më të forta në Japoni, Shtetet e Bashkuara të Amerikës dhe Europë.

Shitjet brenda vendit u rritën me 35% ndërsa në ShBA me 18%./ Reuters