Tre boksierë nga Kosova, në Kampionatin Botëror në Beograd

Beogradi do të jetë nikoqir i Kampionatit Botëror të Boksit amator, në të cilin pritet të marrin pjesë rreth 650 garues, nga 105 shtete.

Në mesin e garuesve të aplikuar janë dhe tre boksierë nga Kosova, të cilët i ka përzgjedhur selektori Besim Brahimi që do të garojnë në tri kategori 54kg: Bashkim Bajoku, 63.5kg: Shpetim Bajoku dhe 71kg: Patriot Behrami.

Sekretari i Federatës së Boksit të Kosovës, Latif Demolli, tha se deri tani nuk ka ndonjë problem dhe presin trajtim të njëjtë me pjesëmarrësit e tjerë.

“Deri me tani nuk ka probleme me boksierët që shkojnë në kampionat dhe se presim trajtim të njëjtë si të gjithë pjesëmarrësit e tjerë. Ditë më parë kisha një telefonatë nga përfaqësuesi i AIBA-s (delegate kryesor i kampionatit) lidhur me akomodimin dhe ardhjen dhe deri tani gjithçka është në rregull. Të njëjtin trajtim e kërkojmë me të gjithë pjesëmarrësit dhe ekipet kombëtare, sepse jemi anëtarë të AIBA-s që nga viti 2013 dhe të barabartë. Në rast se nuk ndodh, ne do të tërhiqemi dhe nuk do të marrim pjesë në Kampionatin botëror në Beograd”, tha Demolli, transmeton EO, përcjell Albinfo.ch.

Boksierët kosovarë pas përgatitjeve bazike në Brezovicë, kanë vazhduar me përgatitjet taktiko-teknike dhe nga 6 tetori janë në përgatitje të përbashkëta deri më 22 tetor, kur do të udhëtojnë në Beograd.