Tre kandidatët shqiptarë nuk arrijnë të sigurojnë vend në Parlamentin e Kantonit

Në mesin e kandidatëve për deputetë të Parlamentit të Kantonit të Neuchatelit kanë qenë edhe tre shqiptarë: Belul Bajrami-Neuchatel, Alban Gashi-Boudry dhe Argur Gashi-La Chaux-de-Fonds.
Asnjëri prej tyre, nuk ka arritur të sigurojë vota të mjaftueshme për të kaluar,  shprehet në një postim të tij në facebook njëri nga tre kandidatët, Belul Bajrami. “Por, rrugëtimin tonë për suksese s’do ta ndalim me këtë humbje”, shkruan ai më tej.

Bajrami është kryesues i Asamblesë komunale të komunës La Tène.

Duhet theksuar se të tre kandidatët me prejardhje shqiptare i takojnë Partisë Socialiste.

Votuesit e tij dhe ata që nuk e kanë votuar kësaj here i ka falënderuar edhe kandidati i ri Argur Gashi, i cili në postimin e tij në facebook shkruan se ka fituar 1458 vota, të cilat sigurisht, nuk kanë mjaftuar për t`i siguruar një vend në Parlamentin e Kantonit Neuchatel.

Në zgjedhjet për Parlamentin dhe Qeverinë e Kantonit që u mbajtën të dielën në Neuchatel (Neuenburg), e djathta ka arritur ta ruajë epërsinë në parlament, ndonëse me 3 deputetë më pak se që ka pasur deri në këto zgjedhje. Tash, raportet në mes të deputetëve të djathtë dhe atyre të majtë janë 58 me 57 në Parlamentin prej 115 deputetësh.