Treni shkel 61-vjeçaren në Pejë, policia po heton rastin

Një 61-vjeçare ka mbetur e vdekur sot pasi është goditur nga treni në fshatin Lutogllavë të Pejës. Rasti po cilësohet si “hetim i vdekjes”.

Rastin e ka konfirmuar Policia Rajonale e Pejës, përmes një komunikate drejtuar mediave.

“Policia e Kosovës, përkatësisht Drejtoria Rajonale e Policisë Pejë, më 30.09.2019, rreth orës 12:40, është informuar për një rast, i cili ka ndodhur në fshatin Lutogllavë, Pejë, në mes të një këmbësori dhe trenit të udhëtarëve. Menjëherë policia ka dalë në vendngjarje, ka bërë sigurimin e vendit të ngjarjes, ekipi mjekësor ka konstatuar vdekjen e viktimës, Z.K. f/k/sh e lindur (1958)”, thuhet në komunikatë.

Në vendin e ngjarjes ka dalë prokurori i shtetit, njësitë relevante të Policisë së Kosovës, dhe me urdhër të prokurorit të shtetit trupi i pajetë i viktimës është dërguar në Institutin e Mjekësisë Ligjore në Prishtinë për obduksion, përcjell albinfo.ch.

Hetuesit rajonalë të DRP-Pejë janë duke bashkëpunuar ngushtë me prokurorin e shtetit për të hetuar të gjitha rrethanat lidhur me këtë rast, i cili është cilësuar si ‘Hetim i vdekjes’.