Trepça planifikon punësimin e 172 minatorëve

Në Trepçë punojnë 1300 persona. Kjo kompani, produktet e veta është duke i shitur në Zvicër

Trepça, e cila pati rënë në zero për shkak të luftës dhe mungesës së investimeve, është duke u rikthyer në treg duke rritur prodhimin dhe investimet.

Për këtë qëllim ka paraparë punësimin e 172 minatorëve të rinj deri në fund të vitit.

Në këtë kompani punojnë rreth 1300 persona me pagë mesatare prej 450 eurove.

” Këtë gjashtëmujor kemi një trend pozitiv dhe një rritje prej së paku 15 për qind në krahasim me vitin e kaluar. Për shkak të kësaj kemi paraparë punësimin e 172 minatorëve të rinj deri në fund të vitit. Punësim do të bëhet në dy faza”, ka bërë të ditur për mediet e vendit, drejtori gjeneral i Trepçës, Ferat Shala.

Sipas tij, kjo është hera e parë që nga vitit 1999 që kjo kompani merr punëtorë të rinj.

Trepça, produktet e veta është duke i shitur tek një kompani zvicerane.

Sipas drejtuesve të saj për momentin kompania shet vetëm koncentrat të plumbit dhe zinkut për shkak se sektori i metalurgjisë dhe i pasurimit të xeheve nuk janë duke funksionuar.