U nda nga jeta ish-futbollisti Afrim Kuçi

Në Gjermani ka ndërruar jetë ish-lojtari i njohur shqiptar, Afrim Kuçi, përcjell albinfo.ch.

Lajmi u njoftuar edhe nga Futbolli Shqiptar në Gjermani. “Lajmi për vdekjen e Afrim Kuçit, njërit prej sportistëve shqiptarë në Gjermani solli dhembje të madhe tek komuniteti sportiv e sportdashës në Gjermani, Kosovë e më gjerë. Kuçi ishte futbollist i talentuar, duke u formuar në Kosovë, në juniorët e Trepçës së Mitrovicës dhe ekipin e Rudarit të Stan Tërgut.

Në Evropë ai luajti në Ligën e dytë suedeze (Modo FF), në Ligën e Parë të Polonisë (Wislla Krakovw) dhe pastaj në Gjermani, në Ligën e tretë, Regionalliga, për SF Siegen. Pastaj kaloi në Eintracht Braunschweig, ku pësoi një atak dhe prej atëherë pa dëshirë u nda nga futbolli gjysmëprofesional, për ta mbyllë karrierën në 1. FC Eschborn, afër Frankfurtit.

Është futbollisti i parë nga Kosova (pas portierit Beqaj) që mori ftesën nga trajneri i atëhershëm Astrit Hafizi, për të luajtur  për Kombëtaren shqiptare dhe pak ditë para ndeshjes kundër Qipros lindin disa probleme të cilat atë e lanë jashtë kombëtares.

Ndarja nga jeta e një ish-futbollisti, një njeriu të çmuar që krijoi rrjet të gjerë të shoqërisë në Gjermani është një humbje e madhe për familjen, shoqërinë dhe futbollin shqiptar”, thuhet në njoftim.