Ukraina aktivizon miliona ushtarë për të rimarrë rajonet e pushtuara

Ukraina po planifikon një ushtri prej miliona personash të pajisur me armë të NATO-s për të rimarrë jugun e vendit nga pushtimi rus, deklaroi ministri i Mbrojtjes, Oleksii Reznikov, shkruan BBC.

”Rimarrja e zonave rreth bregut të Detit të Zi është jetike për ekonominë e vendit”, shtoi Reznikov, transmeton Albinfo.ch.

Deklaratat e ministrit vijnë pasi Rusia bën përparim në pushtimin e territorit në rajonin lindor të Donbasit.

Një sulm në një ndërtesë apartamentesh të dielën vrau të paktën 18 persona, me më shumë se 20 të dyshuar të varrosur nën rrënoja.

Ekipet e shpëtimit janë ende në kërkim të të mbijetuarve në vendin e ndërtesës pesëkatëshe në Chasiv Yar, pranë qytetit të Kramatorsk në rajonin e Donetskut, i cili ishte fokusi i një shtytjeje ruse.

Në intervistën e tij me gazetën The Times, Reznikov vlerësoi Mbretërinë e Bashkuar për të qenë “kyç” në kalimin nga furnizimi i Ukrainës me armë të epokës sovjetike në sistemet standarde të mbrojtjes ajrore dhe municionit të NATO-s.

Ai tha se dërgesat e armëve duhet të përshpejtohen.

“Ne kemi nevojë për më shumë, shpejt, për të shpëtuar jetën e ushtarëve tanë. Çdo ditë që presim, mund të humbasim njëqind ushtarë. Ne kemi rreth 700 mijë në forcat e armatosura dhe kur të shtosh gardën kombëtare, policinë, rojën kufitare, jemi rreth një milion”, tha ministri i Mbrojtjes.