Ulja e ngrohjes në 19 gradë është shkelje e vendimit të Gjykatës Federale

Sipas vendimit, banesat duhet të jenë të paktën 20 gradë të ngrohta, përndryshe mund të kërkohet kompensim

Rregullorja e vënë në fuqi nga Këshilli Federal, sipas të cilës apartamentet mund të ngrohen deri në maksimum 19 gradë në rast krize, bie ndesh me një vendim të Gjykatës Supreme Federale.

Sipas vendimit në fjalë, apartamentet duhet të jenë të paktën 20 gradë të ngrohta, transmeton albinfo.ch. Përndryshe, mund të kërkohet kompensim.

Shoqata zvicerane e sektorit të pasurive të paluajtshme druan se qiramarrësit e shumtë do të padisin në gjykatë për shkak se banesat e tyre nuk do të ngrohen mjaftueshëm, shkruan gazeta “SonntagsZeitung”.

Është e diskutueshme mes specialistëve nëse pronarët e banesave (qiradhënësit) duhet të paguajnë edhe dëmshpërblim nëse kanë refuzuar ngrohjen sipas udhëzimeve të Këshillit Federal.

Madje edhe avokatët që punojnë për ministrin federal të Ekonomisë, Guy Parmelin, nuk janë të sigurt rreth kësaj pike, shkruan gazeta.

---