UP dhe Ministria e Diasporës nënshkruan marrëveshje bashkëpunimi

Universiteti i Prishtinës dhe Ministria e Diasporës, nënshkruan marrëveshje bashkëpunimi, që ka për qëllim shkëmbimin e informacioneve për studentët kosovarë nga vendi dhe mërgata.

Nxënësit nga mërgata do të kenë mundësi të studiojnë në Universitetin e Prishtinës, për të hyrë kështu në proceset zhvillimore të vendit..

Universiteti i Prishtinës do t’i krijojë mundësi mërgatës shqiptare që të mbajë gjallë gjuhën shqipe në vendet ku ata jetojnë. Rektori Mujë Rugova, ka theksuar se marrëveshja e nënshkruar ndërmjet Universitetit të Prishtinës dhe Ministrisë së Diasporës, ka për qëllim që t’u mundësojë nxënësve shqiptarë nga mërgata të vazhdojnë studimet e larta në Universitetin e Prishtinës.

Ministri i diasporës, Ibrahim Makolli, ka deklaruar se kjo marrëveshje do të jetë në funksion të shqiptarëve që jetojnë jashtë vendit.

Sipas tij, interesimi i tyre është që të futen në proceset e zhvillimit të vendit.

Numri i shqiptarëve në mërgatë është shumë i madh, prandaj përpjekjet e ministrisë janë që të mbajë gjallë gjuhën shqipe në diasporë, tha Makolli.

Përmes kësaj marrëveshje do të mundësohet hulumtimi dhe gjetja e mundësive për përfshirjen e studentëve në universitete të ndryshme të botës.

Gjithashtu, do të krijohen mundësi që pas mbarimit të shkollimit të mesëm, nxënësit nga diaspora të mund të studiojnë në Universitetin e Prishtinës.

Marrëveshja parashikon hartimin e projekteve, dërgimin e studentëve dhe studiuesve jashtë vendit dhe kthimin e tyre në atdhe, organizimin e seminareve për mësuesit në mërgatë, botimin e teksteve, e të tjera.