Vajzat shqiptare e hapin turneun ndërsa djemtë e fitojnë kupën

Të shtunën në Euskirchen është mbajtur turneu tradicional i futbollit “Kampionati Botëror `Viehplätzchen` ku janë përballur klube të nacionaliteteve të ndryshme. Turneun e kanë hapur vajzat e bukura shqiptare të shoqërisë së valleve nga Euskirchen-i. Organizimin e turneut e ka marrë përsipër këshilli për integrim dhe bashkësia e sporteve të qytetit Euskirchen, shkruan ksta.de.

Në garë kane marrë pjesë dhjete ekipe që kanë përfaqësuar komunitete të ndryshme. Ndërsa fituesit, klubit FC Kosova, kryebashkiaku dr. Uwe Friedl i ka dorëzuar kupën, transmeton albinfo.ch. “Këtu më shumë bëhet fjalë për një rast të mirë që të jemi së bashku se sa për gara”, ka thënë ai në hapje të manifestimit.
Pasi që moto e aktivitetit ishte shkëmbimi në mes të kulturave, në pjesë të ndryshme të fushës ishin vendosur stenda me specialitete nga kuzhinat e vendeve përkatëse.

Para se të dëgjohej fishkëllima për fillimin e lojërave, vajzat e shoqërisë shqiptare të vallëzimit në Euskirchen prezantuan cilësitë e tyre para publikut.

Secili ekip u prezantua me nga katër lojtarë në fushë të vogël. Një numër ekipesh të paraqitura e kanë anuluar pjesëmarrjen e tyre pak para se të fillonte aktiviteti, e në mesin e tyre edhe një ekip i azilkërkuesve të kombësive të ndryshme.

Megjithatë, turneu ka pasur numër të mirë vizitorësh dhe e ka përmbushur qëllimin e tij për të afruar kulturat në mes vete, transmeton albinfo.ch.

E kupa në fund i takoi ekipit FC Kosova.